Leev Fründinne un Fründe!

Dat mit dem Bedde is su en Saach.
Ich selver han die Erfahrung gemaat,
dat dat nur selten flupp.
Do bes de am bedde und am Kääze opstelle
un et passeet nix.
Kennt ühr dat och?
Et gitterer, di gonn wallfahre noh Santiago de Compostella
oder noh Trier bei der Hellige Mattes,
för  beim Chef em Himmel jet durch ze setze.
Ävver bring et jet?
Wer meint, dat vill bedde vill Erfolg brengk,
dä weed in aller Regel enttäusch.
Stell der für, dat wör esu einfach.
Do däts vun morgens bes ovends op de Knee erömrötsche
un bedde för ene decke Lottogewinn – statt arbeide ze gonn,
dat mäht dich ärm, ävver nit rich.

Wenn der Herrgodd mallich singe eigene Wille wollt erfülle,
dann wör hä nit mih Häär im eigene Huus.
Secher is bedde god,
ävver du solls ding Erwartunge schon in Grenze halde:
Evangelium hin – Evangelium her.
E god Gebedd soll sin wie en Vertrauenserklärung an der Herrgodd,
dat hä et richtig mäht.
Der Kölsche, dä jo met dem Herrgodd op Do steiht –
ohne vill zu bedde un zu beddele –
säht einfach:
Herrgodd, et es wie et es. Un dann es et god.
Un et kütt sowieso wie et kütt.
Un wat säht dä Kölsche noch?
Et hätt noch emmer god gegange.

Wat dä Jesus do met dem Gleichnis üvver et Gebedd gesaht hätt,
dat weed e bissche engeschränk durch andere Wööd,
die hä ooch gesaht hätt (Mt 6, 5-:
„Beim Bedde sollt ihr et nit esu maache wie de Schinghellige,
die Pilarebützer.
Die bedde nämlich gään en de Synagoge oder an de Stroßeneck,
domet de Lück se sinn.
Ich sagen üch: ihre Luhn dofür han se verspillt!
Gangk för et Bedde in ding Zimmer,
maach de Dür zo un bedd zom Vatter em Verborgene!
Der Vatter süht jo, wat verstoche es,
hä weed der der Luhn dofür gevve.
Ihr sollt och beim Bedde nit unnüdig erömschwade wie de Heide.
Die meine nämlich, se däte erhürt weede,
wann se vill Wööd maache.
Maht et nit wie die!
Denn wat ihr nüdig hat,
dat weiß ühre Vatter em Himmel ald em Vürus.“

Noch jet: Bedde  is god!
Ävver genau esu wichtig is et, aanzenemme, wat op üch zokütt.
Denn och dat Schwere em Levve kütt vun unserm Herrgodd.
Dat hätt nämlich och der Jesus liere müsse.
Wesst ehr noch, wie hä gesaht hatt:
„Vatter, wann et mügelich es, loss dä ganze Krom an mer vorüvvergonn“?
Un et hätt nix genütz.
Ävver geliehrt hätt hä,
dat op lange Sicht evvens doch alles god gegange es!

Amen.