Sillig, ihr ärm Hööschte (Prädig op Kölsch 2010) (Lk 6, 17.20-23)

Leev Rest-Christe vun Maye,
leev Fründinne un Fründe us Berghem,
leev Fastelovendsjecke!

Is dat nit schön,
dat mer all widder zesamme sin?
Vun wäge Rest-Christe:
Mir sin vill, wann et drop aankütt.
Vür Johre wore mer noch läppsche 5000,
jetz simmer 13.800 – stundt im vürletzte Parrbreef.
Jojo, dat es inklusiv der Neuerwerbunge us der Nohberschaff.
Stellt üch vür,
die kömen all in de Kirch – jede Sunndag.
Dann hätt uns Pastürche ävver e Problem.
Und dat wolle mer jo nit.
God, eimol loss ich mir dat jo gefalle;
ävver jede Sunndag so vill Lück en der Kirch?
Dot dem Pastur dat nit aan!
Versproche?

Wie ich de Prädig zesamme geknuuv han,
hatt ich Bedenke,
ov dat Evangelium vun de Silligpreisunge
üvverhaup för en Mess met Fastelovendsjecke dat räächte es.
Ich meine: Jo!
Woröm?
Weil keine Vernünftige begriefe kann,
dat för ärm Hööschte dat Rich Goddes do is
ov dat Hungerligger satt ze esse krige
ov dat – wä jetz am Kriesche is – vill zo laache kritt.
Dä Vernünftige säht:
Wo gitt et dann esu jet?
Dä Jeck sät:
Dat han ich ald luuter jesaht
un am eigene Liev erläv.
Et gitt esu vill Schicksalsschläg,
die der de Trone in de Auge drieve.
Ävver met e bessche Goddvertraue
kütt alles aan e god Engk.
Dausenfach han Minsche esu en Lihr gemaht,
un wann ehr ihrlich sid,
is et üch och ald esu ergange.
Han ich nit Rääch?

Un och dat is wohr:
Wä selver ärm es
un nit alle Dags satt ze esse kritt,
wä vör luuter Hätzeleid Trone vergosse hätt,
dä kann och deile un trüste,
wann et andere triff.
Han ich nit Rääch?

Un dann is da noch de Red vun Minsche,
die malträteert, exkommelizeert, usgeschannt un gemobb wääde –
vun wäge däm Minschesonn.
Dat wor domals för die Christe in de eetste 300 Johre ene große Truus.
Et woren Johre der Verfolgung – bis 313.
Dann kom dä Konstantin mit singer Konstantinischen Wende,
un dat Christentum woodt Staatsreligion.
Un wie die Christe dat Sage hatte,
han die et genau esu gemaht:
se han eigene un fremde Lück malträteert,
exkommelizeert, usgeschandt un gemobb.
Dat is e Spill, dat hätt et immer schon gegovve
un dat weed et immer gevve.
Dat hät jet mit Maach zo dun.
Wä et Sage hät, fängk an beklopp zu wääde.
Han ich nit Rääch?

Un wat säht Jesus dozo?
Dot drüvver laache un losst üch de Freud nit nemme.
Der Himmel is üch secher.
Der Jesus hält üvverhaup nix vun Exkommelizeerunge,
nit en der Gesellschaff un och nit en der Kirch.
Drüvver laache is dat einzig Richtige.
Denn mir sin nit dofür do,
uns gägesiggig et Levve schwer ze mache,
villmih uns gägesiggig zu helfe,
damit dat Levve flupp.
Es doch esu, ov nit?

En der Fastelovendszigg spille se alle e Bissche verrück.
Ävver dat is doch grad en große Chance,
endlich üvver der eigene Schatte ze springe,
met dem komische Typ vun nevveaan e Kölsch ze drinke
un dat aale Kreegsbeil zu begrave.
Ov nemm de Messe: eimol em Johr op Kölsch,
un de Lückscher sind do.
Han ich nit Rääch?

Ich hüre jetz op,
ich han alles gesaat,
ich weiß nix mieh
und an Plaatz vun Amen sagen ich – wie jedes Johr:
dreimol Maye Mayoh!