Wat wells do maache? (Prädig op Kölsch, 2016) (Lk 3, 10-14)

Leev Mädche un Junge vun Maye!
Ein Frog es hügg en aller Lücks Mungk
un die heiß: Wat wells do mache?
Dat es en ganz deefgründige Frog,
die zeig, dat mer keine Rod weiß
un och eigentlich op kein Antwood waadt..
Deshalb steiht die Frog och em Rheinische ov Kölsche Grundgesetz.
Se nimmp de 7. Plaatz unger de bekannte kölsche Levvensweisheite en.
Üür wesst jo:
Et Kölsche Grundgesetz zeig dem Normal-Kölsche de Orienteerung,
wie hä et bess met de Wirklichkeit ömgeiht.
§ 1 – Et es wie et es.
          Dat heiß doch:
          De Wirklichkeit es esu un nit anders.
          Dröm redde mer se uns nit schön un och nit schlääch;
          Dann:
§ 2 – Et kütt (suwiesu) wie et kütt.
          Dat heiß:
          Loss de Fingere dovun,
          dann mähs do och nix verkeeht.
          Un:
§ 3 – Et hät noch immer god gegange.
          Diese Zoverseech verdank der normale Kölsche
          singem övverdurchschnittlich gode Droht zom Herrgodd.
Han ich nit Rääsch?

          Un no:
§7 – Wat wells do maache?
          Der Normal-Kölsche weiß,
          dat et mänchmol Momente gitt,
          die looße sich nit ömmodele.
          Wat wells do maache?
          Dröm stellt hä die Frog och so ergebnisoffe.
Also: Wat wells do maache?
Die Frog stellt sich de Bundeskanzlerin schon zigg Monde Dag för Dag,
wann se us dem Finster luurt.
Se süht de Schwitt vun Flüchtlinge,
die op uns Grenz aankütt,
un se all wolle nur dat Eine: Asyl.
Dobei weiß de Kanzlerin genau:
Do kanns do nix maache – usser helfe.
De Mooder Angela nimmp et wie et es
Un mäht de Lück Mod met dem Spruch:
„Dat schaffe mer schon!“
Später weed se sage:
„Et hät noch immer god gegange.“
Han ich nit Rääch?

Dobei hät de Mooder Angela en Hääd Metarbeider un Rodgevver em Parlament,
mänchmol sin die ävver nor Schwaadlappe.
Met lauter Stemm warne se un posaune,
mer hätte jetz Flüchtlinge ze baschte.
Dat es en doll Enseech!
Als wann de Mooder Angela nit zälle könnt….
Wat wolle die üvverhaup?
Solle mer etwa met Waffe - - de Flüchtlinge - - vun de Grenze fotthalde?
Dat kann doch wohl em Ähns keiner wolle! - Oder?
De Rodschläg us dem Süden helfe do wenig.
Je frommer et Parteiboch,
um so nixnötziger de Hingergedanke.
Han ich nit Rääch?

Hält mer sich an de Bibel, es alles ganz einfach.
Wä zwei Gewänder hät,
soll ein dovun dem gevve, dä kein hät.
Dann kritt de Kledage em Schaaf och ens widder Luff.
Han ich nit Rääch?

Wat wells do maache?
Dat froge sich och die Leibwäächter vum Franziskus,
wann dä op Reis geiht.
Letz en Afrika:
Ohne op de Secherheitsvorkehrunge ze aachte,
geiht hä op de Lück zo un deit quasi en de Meng bade.
Op de Frog, op hä kein Angs hät, meint hä:
Enä. Angs han ich nur vür Möcke.
Wat wells do maache?

Ävver theologisch es der Franziskus genau esu unberechenbar.
Fröher däte de Theologe em Kopp mit dem Geheens nohdenke,
wann se e Problem lüse moote.
Der Franziskus mäht Theologie us dem Buch erus.
För e Beispill:
Vör letz Allerhillige hät sing Hilligkeit in Rom en lutherische Gemeinde besök.
En evangelische Frau dät in froge,
ov sei met ehrem katholischen Mann noh de Kommunion gonn dürf.
Do saht der Franziskus:
Ich ben nit kompetent, üch dat zo erlaube.
Üvverlägt dat selver zosamme vörm Herrgodd und vör ührem Gewesse.
Un dann dot, wat Ühr för richtig hald.
Wann dat nit noch Zoff em Vatikan gitt!?!
Ävver wat wells do maache?

Der Franziskus is minge Fründ.
Dä es wie ene Wirvelwind, dä durch de Ampstuvv vun der Kirch fäg.
Hä bräng alles Verstübbte durchenein
un zwing sing Lück, alles neu zo stivvele.
Wann mer jet erneuere well, muss mer zueesch gründlich oprüüme.
Un dovun versteiht hä ene ganze Rötsch.
Am Eng han mer dann en schön neue Kirch.
Han ich nit Rääch?

Leev Lück, dot god op üch oppasse!
Blievt gesund un maht üch jet Freud;
denn et Levve duurt kein Ewigkeit.

Mayoh!